رضا کی بیاض

رات کافی بیت چکی ہے اور سوچ ہے کہ بیکراں سمندر کی طرح امڈتی چلی آ رہی ہے، ایک کے بعد ایک لہر ۔۔۔۔ مجھے اچھی طرح یاد ہے کہ ایک بار جھیل میں ایک پتھر پھینکنے کے بعد میں یہ سوچنے پر مجبور ہوگیا تھا کہ ایک معمولی پتھر پانی کو اس حد تک بےچین کر سکتا ہے کہ لہر در لہر پھیلتا چلا جائے۔۔۔۔ اور اس میں خود کو سمیٹنے کی بھی طاقت اور اختیار نہ ہو،

انسان بھی جھیل کے پانی کی طرح ہے شاید یا شاید اس معمولی پتھر کی طرح ہے ۔۔۔ مگر اب تک میں یہ سمجھنے سے قاصر ہوں کہ انسان دراصل ہے کیا۔۔۔۔ پانی ہے جو طاقت کے باوجود بے اختیار ہے یا وہ پتھر جو چھوٹا ہونے پر بھی طاقت رکھتا ہے۔۔۔۔

جو بھی ہے یہ ایک سوچ شاید خود کو اور اپنی ہستی کو کھوجنے کا ایک بہانہ ہے۔۔۔۔ یا شاید مادیت سے آزادی حاصل کرنے کا ردعمل ہے

شاید یہی فنا اور بقا کا قانون ہے